 |
| مطعم روبى تيوزداى فى مصر فرع سيتى ستارز |
السلام عليكم ورحمة الله وبركاته .. من ساعتين كنت بعمل سيرش عن المطاعم فى الامارات لانى كمان 4 أيام وهسافر على هنا وطبعا أنا الأكل بالنسبة لى من الاساسيات اللى بهتم بيها .. فا افتكرت موقف حصل بالدصفة السنة اللى فاتت أثناء زيارتى لمصر .. كنت أنا وصحابى فى مول فى مدينة نصر إسمه سيتى ستارز أكيد معظم اللى زار مصر عارفه كويس .. المهم ان احنا كنا جعانين وقلنا ناكل .. بس المشكلة كانت ناكل إيييييييييه ؟؟؟
بعد مداولات ومناقشات طوووووووويلة واحنا عمالين نتكلم إتفقنا ناكل هامبورجر لامؤاخذة
برجر زى مالناس بتقول هههههههههه .. بس المشكلة الجديدة كانت ياترى ناكل البرغر " زى ما إخواننا العرب بيقولوا " أو زى ما بيترجموها فى أفلام التسعينات الأجنبى القديمة .. المهم ده يقولك ماك يقوم ده قايله لا ياعم ماك ايه ده مش حلو وده يقولك هارديز يقولك برضه لا لسه واكل عنده من كام يوم .. واللى يقولك مؤمن قام واحد قايله لاياعم مؤمن حلو فى السندويتشات بس وعلى رأى الإعلان " مؤمن مش بتاع حوارات مؤمن بتاع ساندويتشات " المهم واحد طلع من تحت الأرض كده بفوكيرة قالك فيه مطعم جديد لسه فاتح إسمه " روبى تيوزداى " فى الدور الخامس .. كله وافق من منطلق مبدأ الفضول لتجربة كل ماهو جديد .
 |
| بوفيه السلاطات روبى تيوزداى |
المهم طلعنا الدور الخامس وكنا خلاص واقعين بنجيب جاز من الجوع .. قام قايلنا أهو المطعم أهو .. أول إنطباع خدته الصراحة عن المكان من شكله الخارجى إنه مكان كويس ومريح وتصميمه سهل وفى نفس الوقت تحس انه مطعم فيخم كده ههههههههه المهم طبعا مكنش فارق معانا فيخم ولا مش فيخم لان احنا كنا وصلنا لمرحلة المجاعة .. دخلنا المطعم راجل محترم قام جاى وادانا المينيو أو ليستة قائمة الطعام .. صراحة مكنش عندى استعداد أضيع وقت فى قراءة المينيو يادوب أول ما لقطت المينيو قمت طالب " برجر روبى تيوزداى التقليدى أو الكلاسيك " ومحدش يتريق عليا أنا ترجمته زى ماهو موجود فى المينيو.
المهم صحابى كلهم طلبوا زيى قام صاحبى قال شكلهم هياخدوا ساعتين عقبال ما الأكل ييجى بس اللى حصل ان الموضوع مخدش أكتر من نص ساعة أو يمكن أقل فالوقت ده قريت المينيو ولاقيت ان المطعم بيقدم أطباق حلوة وعنده أطباق كتير ده غير انه بيتميز ببوفيه سلاطات كبييييييييييير شكلها يفتح النفس .. المهم الراجل جه بالاكل وصراحة ريحة البرجر كانت قوية وكانت حلوة جدا .. بدأنا ناكل ومفتكرش ان فيه حد سمى الا فى الآخر ههههههههههه بس بصراحة يمكن ده أحسن ساندوتش هامبرجر أنا كلته من زمااااااااااااااااان .. والأهم من كده بقى المشروب .. هما بيقدموا مجموعة مشروبات طبعا مش كحولية مشروبات حلااااااااااااااااااال بس جامدة جدا .. وكلنا برضه طلبنا " روبى المريييييح " وعلى فكرة برضه دى الترجمة الحرفية للمشروب ههههههههههههههههه روبى ريلاكسر .. عاوز أقولكم يا جماعة انه فعلا إسم على مسمى هو فعلا مريح.
 |
| مشروب روبى ريلاكسر -روبى تيوزداى |
بعد ما خلصنا قومنا روحنا بس الصراحة كنا مبسوطين جدا واخر حلاوة وأنا عن نفسى كمحمد إنبسطت هههههههههه .. الناس جوه فى المطعم بتتعامل باسلوب محترم جدا وناس بتضحك فى وشك ده غير الهدف الأساسى وهو الأكل .. صراحة نصيحتى لأى حد نازل مصر أو أى حد فى مصر أصلا إنك لازم تروح تجرب روبى تيوزداى هيعجبكم جدا .. بالنسبة لى ده أحسن مطعم أنا دخلت أكلت فيه فى مصر من زمان.
 |
| مطعم روبى تيوزداى فى مصر |
0 التعليقات:
إرسال تعليق